Poppsöngkonan Katy Perry er sögð vera að slá sér upp með engum öðrum en fyrrverandi forsætisráðherra Kanada, Justin Trudeau. Það er skammt stórra högga á milli hjá Perry en aðeins nokkrar vikur eru síðan að greint var frá því að áralangt samband hennar við leikarann Orlando Bloom rann út í sandinn.

Perry, sem er fertug, og Trudeau, 53 ára,  hafa sést saman tvívegis á aðeins einni viku og er hermt að sambandið hafi þróast hratt og neistar flogið.

Samkvæmt umfjöllun bandarísku útgáfu The Sun eru vinir Perry eru hins vegar uggandi og eru hræddir um að hún sé að flýta sér um of enda er hún engan veginn komin yfir sambandið við Bloom.

„Katy er enn að syrgja sambandið við Orlando og þá staðreynd að þau giftust aldrei,“ segir einn heimildarmaður blaðsins. „Vinir hennar vilja að hún skemmti sér, en ekki að hún hlaupi strax í eitthvað alvarlegt, sérstaklega ekki með manni sem er sagður elska athyglina og hafa orð á sér sem kvennabósi.“

Perry og Trudeau hittust fyrst á tónleikum þar sem fyrrverandi stjórnmálamaðurinn var mættur ásamt unglingadóttur sinni og sást brosa breitt til söngkonunnar. Stuttu síðar sáust þau saman í göngutúr sem og í kvöldverði á veitingastað í Montreal.

Önnur heimild lýsir því að Trudeau hafi verið „mjög spenntur“ fyrir stefnumótinu. „Hann er ekki maður sem er auðvelt að ná í, en hann hefur fengið mikla athygli frá konum síðan hann skildi við eiginkonu sína.“

Perry og Trudeau eru sögð ná vel saman enda bæði afar opin og þekki frægðina vel. „Hann hræðist ekki frægð hennar – hann er vanur sviðsljósinu sjálfur,“ segir einn heimildarmaður.