Vopn og peningar streyma til Úkraínu frá Vesturlöndum. Allt er þetta liður í að aðstoða landið við að verjast rússneska innrásarhernum. En frá því að stríðið hófst, hefur heldur fækkað í vinahópi Úkraínu og margir taka eftir því.

Þegar Mark Rutte, framkvæmdastjóri NATÓ, og Donald Trump, forseti Bandaríkjanna, funduðu nýlega í Hvíta húsinu í Washington D.C. sá heimsbyggðin hvaða lönd styðja Úkraínu af alvöru.

Rutte las þá upp nöfn þeirra ríkja sem ætla að kaupa bandarísk vopn fyrir 10 milljarða dollara fyrir Úkraínu. Meðal vopnanna verða Patriot-loftvarnarkerfi og ýmsar tegundir skotfæra.

Þessi lönd eru: Þýskaland, Finnland, Danmörk, Svíþjóð, Noregur, Bretland, Holland og Kanada.

Þetta er því ansi stuttur listi yfir viljugar þjóðir sem eru tilbúnar til þátttöku í svona stóru og mikilvægu verkefni.

Jótlandspósturinn bendir á að þetta sýni samtímamynd af þróun mála því stuðningsríkjum Úkraínu hafi fækkað og sífellt meira sé skrifað með smáu letri og kröfur gerðar um að sérstakt tillit sé tekið til ákveðinna þátta hjá hinum ýmsu þjóðum.

Fleiri lönd geta enn bæst við þennan hóp stuðningsþjóða en fyrir liggur að margar stórar þjóðir eru fullar efasemda, svo ekki sé meira sagt.