Sara Vilbergsdóttir myndlistarkona fagnar í dag 13 ára afmælisdegi, sem verður að teljast sérstakt þar sem hún er fædd í ágúst 1956. Í dag eru 13 ár síðan Sara fór í hjartastopp og var endurlífguð á bensínstöðvarplani í Hveragerði.
„Í dag, 8. júlí 2025 eru 13 ár síðan ég fór í hjartastopp í sunnudagshádegi, klukkan 12:47 á plani bensínstöðvar í Hveragerði og bókstaflega dó en fyrir kraftaverk og hetjuleg viðbrögð aðvífandi bjargvætts tókst að endurlífga mig sem ekki var auðvelt og tók hátt í klukkustund.“
Sara segir í samtali við DV að hún hafi verið á leið í sumarfrí með eiginmanninum þegar áfallið varð.
„Við hjónin vorum að fara í sumarfrí að elta sólina með fellihýsið í eftirdragi. Stoppuðum í Hveragerði til að ná í vatn á fellihýsið og á meðan maðurinn minn leit í kringum sig eftir vatnskrananum hné ég niður. Hafði verið hress að tala í símann fimm mínútum áður.“
Það vildi Söru til bjargar að Kristján Ingi Kristjánsson, lögreglumaður sem var á frívakt og á leið í sumarbústað ásamt eiginkonu sinni kom að.
„Þau stukku út úr bíl sínum og hann byrjaði strax að hnoða mig og gerði það samfellt í 11 mínútur áður en sjúkrabíllinn kom. Ef ekki hefði verið fyrir það hefði ég verið heiladauð eftir fimm mínútur. Mikið afrek og býð ekki í líðan hans næstu vikurnar á eftir!
Sjúkraflutningamennirnir þurftu að stuða mig 16 sinnum til að koma mér í gang og á tímabili voru þeir að gefast upp og til stóð að skrá niður dánarstund en til allrar lukku var ákveðið að reyna aðeins lengur. Ég get ekki lýst því nægilega með orðum hvað ég er óendanlega þakklát fyrir Kristján Inga og hans konu sem og allt það fólk sem kom að björguninni og allt það fólk sem tók á móti mér á spítölunum.“
Sara segir að það hafi verið flensuvírus sem orsakaði hjartastoppið. Á spítala var settur í hana bjargráður, sem var endurnýjaður fyrir tveimur árum.
„Svo ég er ávallt með innri stuðara ef eitthvað kemur upp á í þessa veru. Heilsan hefur verið ótrúlega góð, ég er á hjartalyfjum og hef ekki lent í svona hremmingum aftur,“ segir Sara í samtali við DV.
Sara segir í færslu á Facebook þar sem hún fagnar deginum að líf hennar hafi verið innihaldsríkt og með öðrum blæ á margan hátt eftir þessa reynslu.
„Það var með ólíkindum að fyrir tilviljun safnaðist að mér fólk sem brást hárrétt við, fagfólk fram í fingurgóma, til dæmis læknir á frívakt í göngutúr sem gat stutt lækninn sem kom með sjúkrabílnum, hjúkrunarfræðingur í hlaupahóp sem hljóp fram á okkur og setti upp nál, kona úr nágrenninu sem tók sig af manninum mínum sem var skiljanlega óttasleginn og svo mætti lengur telja.
Ég var auðvitað meðvitundarlaus næstu sólarhringana á gjörgæslu og dvaldi á Landspítalanum í mánuð á meðan ég var að byrja að jafna mig svo ég man ekkert af þessu en byggi þetta á frásögnum bjargvættanna og sjúkraskýrslu um atburðinn. Enn og aftur, Ástarþakkir til ykkar allra sem gáfuð mér áframhaldandi líf með gæsku ykkar og fagmennsku.“
Sara segir í lokin að það hafi verið heldur tillitslaust af henni að lenda í þessu á afmælisdegi Bryndísar systur sinnar. En fyrir vikið eigi þær nú sameiginlegan afmælisdag, Sara sé 13 ára í dag en verði líka 69 ára eftir tæpan mánuð.
Með færslu sinni á Facebook deilir Sara mynd sem hún og Svanhildur systir hennar máluðu saman af sjúkrabeðinu og þeim systrum ásamt Súperman, manninum með ljáinn og sjúkraflutningamanni.
