Glannalegur akstur rútubílstjóra á Suðurlandi vakti mikla reiði og ótta hjá nálægum bílstjórum. Rútubílstjórinn tók fram úr öðrum bílum á blindhæðum þegar bílar voru að koma úr gagnstæðri átt.
Íslensk hjón sem voru að keyra á milli Selfoss og Hvolsvallar á ellefta tímanum í morgun urðu vitni að glannaakstrinum.
Við DV segja þau að það hafi verið rosalegt að horfa upp á þetta. Voru þau fegin að börnin þeirra voru ekki á ferðinni í bæinn á meðan þessi rútubílstjóri væri á vegunum.
Byrjuðu þau að taka eftir rútunni fljótlega eftir að þau komu á Selfoss. Þau þurftu að stoppa á Hvolsvelli en rútan hélt áfram.
Eins og sést á myndböndum sem hjónin tóku keyrði rútubílstjórinn fram úr öðrum bílum á blindhæð. Sést einnig að bílar koma úr gagnstæðri átt. Hefði því slíkur framúrakstur geta farið mjög illa.
