Forseti Inter Milan, Giuseppe Marotta, hikaði ekki er hann ræddi við fjölmiðla um ný ummæli leikmanns liðsins, Lautaro Martinez.

Martinez greindi frá því að hann væri að leitast eftir því að vinna titla og að þeir leikmenn sem væru ekki til í að berjast fyrir félagið mættu finna sér nýtt félag.

Martinez nafngreindi ekki þá leikmenn sem ‘vilja ekki berjast’ fyrir félagið en Marotta er engum líkur og var til í að kasta Hakan Calhanoglu undir rútuna.

,,Ummæli Lautaro um leikmenn sem vilja ekki vera hér og berjast? Hann nafngreindi engan en ég skal gera það. Þetta voru skilaboð til Hakan Calhanoglu.“

,,Við munum ræða við Hakan og reyna að ná sáttum um starfslok og við gerum það án allra vandræða.“

Calhanoglu hefur spilað með Inter undanfarin fjögur ár en hann er 31 árs gamall og er landsliðsmaður Tyrklands.