Helgi Fannar Sigurðsson skrifar frá Sviss

Rúnar Ingi Erlingsson, körfuboltaþjálfari og eiginmaður Natöshu Anasi landsliðskonu, segist eðlilega ótrúlega stoltur af sinni konu.

Rúnar er auðvitað hér í Thun þar sem Ísland mætir Finnum í opnunarleik EM klukkan 16. Hann er bjartsýnn fyrir kvöldinu.

„Þetta leggst mjög vel í mig. Það er ótrúleg stemning hérna og fyrsti leikur svo það er mikil eftirvænting. Ég vonast að sjálfsögðu eftir þremur stigum,“ segir hann.

„Þetta er ótrúlega skemmtilegt og veðrið leikur við okkur, heiðskírt og 30 stiga hiti, sem er kannski aðeins of heitt fyrir suma.“

Rúnar og Natasha hafa verið saman í hartnær níu ár og hún upplifað mikla velgengni innan vallar á þeim tíma.

„Ég gæti ekki verið stoltari. Þegar ég kynntist konunni minni í byrjun marsmánaðar 2016 átti ég ekkert von á því að vera í íslenskri landsliðstreyju merktri henni níu árum síðar í Thun í Sviss.

Ég er ótrúlega stoltur af henni. Hún er að tikka í öll markmiðaboxin sem hún hefur sett sér.“