Helgi Fannar Sigurðsson skrifar frá Sviss

Evrópumótið í Sviss er á næsta leyti og leikur Ísland fyrsta leik mótsins, gegn Finnum. Samkvæmt bókinni góðu er það slakasta lið riðilsins og því afar mikilvægt fyrir Stelpurnar okkar að taka sigur í þessum leik.

Veðbankar eru hliðhollir Íslandi og á Lengjunni er stuðull á sigur Íslands til að mynda 1,73. Stuðull á sigur Finnlands er 3,82 og 3,23 á jafntefli.

Hvað möguleika Íslands á mótinu varðar virðast veðbankar almennt ekki hafa allt of mikla trú. Noregur og Sviss, sem einnig eru í riðlinum og leika innbyrðis sama dag og Ísland og Finnland, eru talin mun sigurstranglegri í riðlinum. Þar eru Norðmenn skör ofar.

Íslenska liðið er hins vegar það hæst skrifaðasta samkvæmt heimslista FIFA af þessum fjórum þjóðum og hafa Þorsteinn Halldórsson landsliðsþjálfari og leikmenn ekki farið leynt með það að stefnan sé sett rakleiðis upp úr riðlinum.

Ljóst er að það yrðu mikil vonbrigði að takast ekki ætlunarverkið.

Dagskrá Íslands á EM
2. júlí gegn Finnum
6. júlí gegn Sviss
10. júlí gegn Noregi