Fimm einstaklingar sem handteknir voru í aðgerðum lögreglunnar á Norðurlandi eystra, í samvinnu við þrjú önnur lögregluembætti, á dögunum hafa verið úrskurðaðir í áframhaldandi gæsluvarðhald.

Málið varðar skipulagða brotastarfsemi sem snýr að framleiðslu á fíkniefnum á nokkrum stöðum á landinu.

Ráðist var í aðgerðir á nokkrum stöðum, meðal annars á Raufarhöfn, þann 18. júní síðastliðinn og voru fimm einstaklingar úrskurðaðir í vikulangt gæsluvarðhald í Héraðsdómi Norðurlands eystra. Landsréttur staðfesti síðar úrskurðinn.

Samkvæmt kröfu lögreglunnar á Norðurlandi eystra hefur Héraðsdómur Norðurlands eystra nú framlengt gæsluvarðhald yfir sömu aðilum til 4. júlí næstkomandi. Fjórir af þessum fimm aðilum hafa kært þessa úrskurði til Landsréttar.

Unnið er að rannsókn málsins, að því er segir í tilkynningu lögreglu.