Ef mið er tekið af sögunni á Íslandi þarf KR svo sannarlega að óttast það að liðið geti fallið úr Bestu deild karla í sumar.

KR hefur fengið á sig 32 mörk í fyrstu tólf umferðum Íslandsmótsins, ekkert lið sem hefur fengið á sig álíkan fjölda af mörkum hefur haldið sér í deildinni.

Frá aldamótum hafa öll lið sem hafa fengið á sig nálægt þessum fjölda af mörkum fallið úr deildinni.

Skagamenn eru í sömu stöðu þegar kemur að mörkum á sig en liðið hefur fengið á sig 31 mark en skorað töluvert mikið minna en KR. Staðan á Akranesi er því svört.

KR skorar þó töluvert meira en önnur lið sem hafa verið í sömu vandræðum í varnarleik, liðið hefur skorað 31 mark og fengið á sig 32 mörk.

Óskar Hrafn Þorvaldsson þjálfari liðsins er að breyta miklu í Vesturbæ og hefur fengið lof fyrir, vandræðin í varnarleik hafa hins vegar verið mikil.

Flestir sparkspekingar telja engar líkur á því að KR falli úr deildinni en liðið situr í tíunda sæti deildarinnar og er einu stigi frá fallsæti.

Sagan:
2024 – Fylkir fékk á sig 32 mörk í fyrstu tólf leikjunum og féll
2019 – ÍBV fékk á sig 29 mörk í fyrstu tólf leikjunum og féll
2016 – Þróttur fékk á sig 32 mörk í fyrstu tólf leikjunum og féll
2015 – Keflavík fékk á sig 31 mark í fyrstu tólf leikjunum og féll
2012 – Grindavík fékk á sig 30 mörk í fyrstu tólf leikjunum og féll
2008 – HK fékk á sig 32 mörk í fyrstu tólf leikjunum og féll
2005 Grindavík fékk á sig 28 mörk í fyrstu tólf leikjunum og féll
2000 – Leiftur fékk á sig 30 mörk í fyrstu tólf leikjunum og féll