Eins og kunnugt er vörpuðu Bandaríkjamenn sprengjum á kjarnorkutengd mannvirki í Íran og kom sú ákvörðun mörgum í opna skjöldu, enda hafði komið fram nokkrum dögum áður að Trump vildi gefa Írönum færi á að setjast við samningaborðið. Eftir árásina sagði Trump að Bandaríkjamenn hefðu slegið vopnin úr höndum yfirvalda í Íran.
Vassily Nebenzia, sendiherra Rússlands hjá Sameinuðu þjóðunum, varaði við því á neyðarfundi Öryggisráðsins að bein afskipti Bandaríkjamanna gætu haft ófyrirséðar afleiðingar. Meðal þess sem menn óttast er að Íran muni hefna með hryðjuverkaárásum á Vesturlönd.
„Yfirvöld í Washington hafa nú ítrekað að til að þjóna hagsmunum bandamanns síns, Ísraels, séu þau ekki einungis reiðubúin til að loka augunum fyrir drápum á tugum þúsunda kvenna, barna og aldraðra í Palestínu, heldur einnig að taka áhættu með öryggi og velferð alls mannkyns. Með aðgerðum sínum hefur Bandaríkjunum tekist að opna Pandórubox – enginn veit hvaða nýju hörmungar og þjáningar það mun leiða af sér,“ sagði hann.
Nebenzia hélt því fram að Rússland hefði boðið sig fram til að hafa milligöngu um að finna friðsamlega lausn á kjarnorkumálum Írands. Benti hann á að Bandaríkin, sérstaklega leiðtogar landsins, væru augljóslega ekki mjög áhugasamir um diplómatískar lausnir þessa dagana.
Kallaði Nebenzia eftir því að róa þyrfti öllum árum að því að minnka spennuna í Mið-Austurlöndum. Að öðrum kosti gæti heimurinn allur staðið á barmi kjarnorkuhamfara.
