Breskir fjölmiðlar greindu frá því í gær að „bein og föt“ hefðu meðal annars fundist í leitinni. Einstaklingur sem er náinn rannsókn málsins segir aftur á móti við Mail Online að beinin sem fundust hafi að öllum líkindum verið dýrabein og þá hefðu fötin sem fundust verið í fullorðinsstærðum.
„Við vissum alltaf að þetta væri tímasóun en við verðum að sýna samvinnu. Hvað bjuggust þeir við að finna eftir 18 ár? Við vorum tilbúin að vinna með þeim en vissum að þetta væri tímasóun,“ segir lögreglumaður sem kom að rannsókninni við Mail Online.
Það voru lögregluyfirvöld í Þýskalandi sem fóru fram á nýja leit að líkamsleifum Madeleine. Madeleine var aðeins þriggja ára þegar hún hvarf en lengi hefur verið talið að þýski barnaníðingurinn Christian Brueckner hafi numið hana á brott og orðið henni að bana.
Brueckner er í fangelsi í Þýskalandi þar sem hann afplánar sjö ára dóm fyrir nauðgun. Að óbreyttu líkur hann afplánun þess dóms í september næstkomandi og er þýska lögreglan í kapphlaupi við tímann að finna eitthvað sem tengir hann beint við hvarfið á Madeleine.
Í fréttum portúgalskra fjölmiðla kemur fram að við leitina í síðustu viku hafi eitt og annað fundist sem verður sent í rannsókn og skoðað betur. Engin ótvíræð sönnunargögn um afdrif Madeleine hafi þó fundist í leitinni.
