Valsmenn fengu að kenna á því í nýjasta þætti Þungavigtarinnar, en þar var 3-0 tap liðsins gegn FH á sunnudag gert upp.

FH vann leikinn sannfærandi og þótti meðlimum þáttarins ekki mikið til Vals koma í leikum. Hlíðarendaliðið er þá aðeins með 6 stig eftir fimm umferðir í Bestu deild karla.

Upplegg Vals undir stjórn Túfa, sem tók við um mitt tímabil í fyrra af Arnari Grétarsyni, var gagnrýnt harðlega. Einhverjir telja að hann eigi að leggja meiri áherslu á að sækja upp kantana.

„Þetta bakvarðadæmi og vængspil, sem þeir hafa svolítið gert út á síðustu ár, er bara ekki til í dag. Tryggvi Hrafn er lost vinstra megin og Jónatan fann sig ekki,“ sagði Kristján Óli Sigurðsson og hélt áfram.

„Ég verð að setja spurningamerki við þessa tvo útlendinga (Marius Lundemo og Markus Nakkim), sem eru væntanlega rándýrir. Það er ekkert að gerast. Aron Jó, Lúkas Logi, enginn er að taka hlaup inn fyrir og mér fannst eins og þeir séu í skemmtiskokki í Reykjavíkurmaraþoninu.“

Viktor Unnar Illugason, sem var í þjálfarateymi Vals í fyrra, var einnig í þættinum. „Það er allt í lagi að geta brotið leikinn upp. Þeir eru með bakverði sem geta tekið utan á hlaup, í Sigurði Agli til að mynda,“ sagði hann.

Kristján Óli sagði þá að frá því að fyrrum þjálfarinn, Arnar, hafi einmitt verið í Kaplakrika á sunnudag og var hann ekki hrifinn af sínu fyrrum liði.

„Ég sat með Arnari Grétarssyni, fyrrum þjálfara Vals, í stúkunni í gær og hann hristi hausinn ansi oft. Hann átti ekki orð.“