Real Madrid er að undirbúa miklar breytingar á leikmannahópnum í sumar ef marka má nýjar fréttir frá Þýskalandi.

Tímabilið 2025–26 hefur verið erfitt fyrir spænska stórliðið. Xabi Alonso var rekinn í janúar og Álvaro Arbeloa tók við, en árangurinn hefur verið sveiflukenndur. Real er nú fjórum stigum á eftir Barcelona í toppbaráttu La Liga, tapaði einnig spænska Ofurbikarnum og féll úr bikarkeppninni gegn neðrideildarliði Albacete.

Samkvæmt BILD gætu allt að sex leikmenn yfirgefið félagið í sumar. Austurríski varnarmaðurinn David Alaba er efstur á listanum, en samningur hans rennur út og ákvörðun um brottför hans er sögð þegar tekin.

Antonio Rüdiger gæti einnig farið þegar samningur hans rennur út, þó möguleiki sé á viðræðum þar sem hann hefur unnið sér aftur sæti í liðinu. Dani Carvajal er annar leikmaður sem gæti kvatt félagið eftir langan og sigursælan feril.

Athygli vekur að Eduardo Camavinga gæti einnig verið seldur. Franski miðjumaðurinn, sem er aðeins 23 ára, gæti farið ef Real fær tilboð upp á að minnsta kosti 50 milljónir evra.

Að auki eru bakverðirnir Ferland Mendy og Fran García sagðir ekki í framtíðaráætlunum félagsins. Real Madrid mun því líklega fara í umfangsmikla endurnýjun á hópnum í sumar með það að markmiði að snúa aftur á toppinn.