Dominik Szoboszlai, miðjumaður Liverpool, hefur hvatt stuðningsmenn liðsins til að standa betur með liðinu eftir að hafa tekið eftir því að margir yfirgefa leikvanginn áður en leikjum lýkur.

Szoboszlai sagði að leikmenn tækju eftir því þegar stuðningsmenn færu heim áður en leikurinn væri búinn, sérstaklega þegar liðið væri að lenda undir eða ganga í gegnum erfiða kafla.

Ummælin koma eftir 1-1 jafntefli gegn Tottenham á sunudag.

„Ég held að það hjálpi okkur ekki þegar fólk byrjar að fara heim eftir um 80 mínútur. Allir taka eftir því og þegar við fáum á okkur mark þá eru enn fleiri sem fara af vellinum,“ sagði Szoboszlai.

Hann sagðist skilja að stuðningsmenn væru svekktir yfir úrslitum en lagði áherslu á að liðið þyrfti á stuðningi þeirra að halda.

„Við viljum gera stuðningsmennina ánægða, það er ekki eins og við gerum mistök viljandi. Þeir mega vera reiðir, en þeir ættu að standa með okkur því við erum ein fjölskylda og þurfum á þeim að halda,“ bætti hann við.