Pep Guardiola viðurkennir að hann geti ekki hvílt Erling Haaland þegar Manchester City mætir Bodø/Glimt í Meistaradeild Evrópu á þriðjudagskvöld.

Guardiola sagði í síðustu viku að Haaland væri orðinn örmagna og frammistaða Norðmannsins var undir pari í tapinu gegn Manchester United í borgarslagnum á Old Trafford um helgina. Haaland haltraði til búningsklefa í hálfleik eftir að hafa fengið aðhlynningu í kjölfar samstuðs við Harry Maguire og var svo tekinn af velli á 80. mínútu eftir lítil áhrif á leikinn.

Þrátt fyrir þetta segist Guardiola ekki geta gefið Haaland hvíld fyrr en Omar Marmoush snýr aftur frá Afríkukeppni landsliða. Egyptinn verður ekki með í ferð City til Noregs og nýi leikmaðurinn Antoine Semenyo er ekki gjaldgengur í leikinn.

Haaland mun því leiða sókn City á ný í heimalandi sínu. Guardiola gaf til kynna að líklegra væri að hvíla hann í leikjum gegn Wolverhampton Wanderers eða Galatasaray síðar í vikunni, þegar Marmoush getur tekið við hlutverkinu.

„Nei, ég held að Omar fari ekki til Noregs,“ sagði Guardiola.

„Erling mun spila. Við þurfum hann. Hann er gríðarlega mikilvægur fyrir okkur. Við eigum marga stóra leiki fram undan, nánast á þriggja til fjögurra daga fresti, og við verðum að halda áfram.“