Ferill Raheem Sterling virðist vera að sigla í strand. Sterling er samningsbundinn Chelsea til sumarsins 2027, en þá verður hann 32 ára gamall.

Hann hefur hinsvegar verið útilokaður af Enzo Maresca, stjóra liðsins. Sterling vildi fara í sumar en fann ekki rétta kostinn. The Telegraph greinir frá því að hinn einangraði enski vængmaður hafi hafnað tveimur tilboðum um að yfirgefa Chelsea og leita á ný mið.

Samkvæmt sömu heimild æfa Sterling og varnarmaðurinn Axel Disasi nú aðskildir frá aðalliðinu og Enzo Maresca hafi ekki séð þá í marga mánuði.

Launapakki Sterling hjá Chelsea er sögð ein ástæða þess að hann sé áfram hjá félaginu en hann fær um 300 þúsund pund á viku þar.

Sterling gekk til liðs við Chelsea árið 2022, en dvölin hefur reynst stormasöm. Hann fór á lán til Arsenal á síðasta tímabili en náði þar litlu flugi. Nú er ljóst að hann á ekki framtíð hjá Chelsea.

„Manchester United hafði áhuga sumarið 2024 en fékk lítil svör frá leikmanninum,“ skrifar Sam Wallace, aðalknattspyrnufréttaritari Telegraph.

„Bayern München hafði samband á lokadegi gluggans núna þegar félagið var í viðræðum við Chelsea um Nicolas Jackson. Napoli sýndi einnig áhuga. Af óútskýrðum ástæðum virtist Sterling tregur til að flytja til útlanda og jafnvel út fyrir London. Þá hefur einnig verið áhugi frá Sádí Arabíu, en ekkert varð úr því.“