Ný herferð Landsbankans í tilefni af EM kvenna í knattspyrnu er farin í loftið. Í auglýsingunni fylgjumst við með ungri stelpu sem heyrir spennandi tilkynningu í útvarpinu og stekkur af stað í leit að penna. Við sjáum fólk á öllum aldri um allt land gera slíkt hið sama og þau halda öll í átt að ótilgreindum stað.
Unga aðalsöguhetjan kemst loks með pennann sinn á áfangastað sem er troðfullur af fólki. Hún brýtur sér leið í gegnum fjöldann og að borði þar sem landsliðskonurnar Sandra María Jessen, Karólína Lea Vilhjálmsdóttir og Natasha Moraa Anasi-Erlingsson sitja.
Í stað þess að unga söguhetjan fái eiginhandaráritun frá landsliðinu, þá er dæminu snúið við og hún gefur landsliðskonunum sína áritun. Þessi táknræni stuðningur í formi áritana fylgir síðan Stelpunum okkar á lokamót EM í Sviss.
Landsbankinn safnar nú eiginhandaráritunum frá almenningi til stuðnings íslenska kvennalandsliðsins. Landsmenn geta farið inn á síðuna landsbankinn.is/aframisland og gefið þar rafræna eiginhandaráritun fyrir Stelpurnar okkar.
Slagorð herferðarinnar Skrifum söguna saman er tilvísun í þennan stuðning frá íslensku þjóðinni og þá staðreynd að góðar líkur eru á að Ísland komist áfram úr sínum riðli. Stelpurnar okkar hafa ítrekað sýnt og sannað að Ísland býr yfir landsliði í fremstu röð, en þetta er í fimmta sinn í röð sem þær komast á lokamót EM.
Herferðin var unnin með vörumerkjastofunni Tvist. Framleiðsla og kvikmyndataka var á vegum framleiðslufyrirtækisins Norður og Álfheiður Marta Kjartansdóttir leikstýrði.
