Joshua Kimmich viðurkennir að tölfræði goðsagnarinnar Cristiano Ronaldo sé galin en þessir menn munu mætast á morgun í Þjóðadeildinni.

Ronaldo er markahæsti landsliðsmaður sögunnar en hann hefur skorað 136 mörk í 219 leikjum fyrir Portúgal sem er í raun ótrúlegt.

Kimmich mun ná sínum 100. leik í þessum undanúrslitaleik Þjóðadeildarinnar og er sjálfur mjög stoltur af því afreki.

,,Ég hef lesið það að hann hafi skorað 136 mörk fyrir landsliðið. Hans tölfræði er klikkuð, sérstaklega þegar þú tekur stöðugleikann inn í þetta allt saman,“ sagði Kimmich.

,,Hann hefur spilað í hæsta gæðaflokki í yfir 20 ár og er enn að spila vel fyrir landsliðið. Ég er stoltur af því að ná 100 landsleikjum.“