Lamine Yamal var smeykur um það að hann myndi ekki fá svar frá fyrrum leikmanni Barcelona, Neymar, eftir að hafa sent skilaboð á þann brasilíska.

Yamal er efnilegasti leikmaður heims í dag og spilar með Barcelona og er mikill aðdáandi Neymar sem lék með liðinu um tíma.

Raphinha, liðsfélagi Yamal, segir að strákurinn sem er 17 ára gamall hafi óttast það að fá ekki svar til baka frá Neymar sem spilar í dag í Brasilíu.

Raphinha þekkir Neymar vel og eru þeir saman í brasilíska landsliðinu en hann leikur einnig með Barcelona í dag ásamt Yamal.

,,Hann spurði mig hvort Neymar myndi svara ef hann myndi senda skilaboð til hans,“ sagði Raphinha.

,,Ég svaraði og sagði auðvitað. Miðað við þann stað sem hann er kominn á í dag þá getur hann talað við hvern sem er og jafnvel Neymar. Það er engin tilviljun að þeir hafi náð að hittast.“

Yamal fékk að hitta Neymar stuttu síðar í sumarfríinu sínu og birtu þeir mynd á samskiptamiðla sem gladdi marga.