Málið á rætur sínar að rekja til janúar 2023. Kerr, sem er ein besta knattspyrnukona heims, og kærasta hennar Kristie Mewis, sem einnig er knattspyrnukona, lentu upp á kant við leigubílstjóra í London.
Höfðu þær verið úti að skemmta sér og ætluðu þær að taka leigubíl heim. Á leiðinni kastaði önnur þeirra hins vegar upp í bílnum og krafði leigubílstjórinn þær um sérstakt gjald vegna þess. Áttu þær að hafa neitað.
Leigubílstjórinn hringdi því á lögregluna og í stað þess að fara með þær heim fór hann á næstu lögreglustöð. Á leiðinni þangað braut parið rúðu og vann skemmdir á skilunum sem gjarnan eru milli bílstjóra og farþega í leigubílum.
Kerr taldi að leigubílstjórinn hafi haldið henni og Mewis gegn vilja þeirra og sagði að þær hafi verið hræddar. Á lögreglustöðinni lét hún lögreglumenn heyra það fyrir að taka máli þeirra ekki trúanlega, eins og heyra má af upptöku á búkmyndavél lögreglumannsins Stephen Lovell.
„Þið eruð fokking heimskir og hvítir. Ég skal horfa í augun á þér og segja þetta, þið eru svo fokking heimskir,“ sagði hún meðal annars.
Kerr var þó sýknuð í dag. Útskýrði hún til að mynda fyrir réttarsal að leigubílstjórinn hafi meinað henni að hafa bílrúðuna opna er hún þurfti að kasta upp. Ítrekaði hún þá henni og Mewis hafi liðið eins og verið væri að halda þeim í bílnum gegn þeirra vilja.
Þvertók Kerr þá fyrir kynþáttaníð í garð lögreglu. Öllu heldur vill hún meira að öðruvísi hafi verið komið fram við hana vegna húðlits.
