Knattspyrnudeild Vals hefur ráðið Kirian Elvira Acosta sem nýjan styrktar- og frammistöðuþjálfara meistaraflokks karla og yfirmann styrktarþjálfunar yngri flokka félagsins.

Kirian kemur til Vals frá Fram, þar sem hann hefur undanfarin ár sinnt sambærilegu starfi. Hann hefur á stuttum tíma byggt upp sterka ímynd sem faglegur og metnaðarfullur frammistöðuþjálfari með framsækna nálgun á hreyfigreiningu, endurheimt og einstaklingsmiðaða þjálfun.

Kirian sem er frá Spáni er með meistaragráðu í afreksþjálfun íþróttaliða (High Performance in Team Sports), meistaragráðu í íþróttaframmistöðu og heilsu (Sports Performance and Health), kennsluréttindi í íþróttum á framhaldsskólastigi (Master of Education in Physical Education) og bachelorgráðu í íþrótta- og líkamsræktarvísindum (Sports and Exercise Science).

Hann hefur auk þess starfað víða um Evrópu, meðal annars hjá Malmö FF í Svíþjóð, SJK Seinäjoki í Finnlandi og á Spáni með Club Costa City og Atticgo BM Elche.

Kirian leggur sérstaka áherslu á heildræna nálgun þar sem líkamleg frammistaða, endurheimt, næring og hugarfar vinna saman að því að hámarka afköst leikmanna.

„Við erum gríðarlega ánægð með að fá Kirian til liðs við okkur. Ég þekki vel til starfa hans og hann hefur sýnt mikla fagmennsku og yfirvegun í starfi og kemur inn með þekkingu sem mun nýtast bæði leikmönnum og þjálfurum félagsins. Með komu hans erum við að styrkja faglegt innra starf til framtíðar,“ segir Gareth Owen tæknilegur ráðgjafi knd. Vals.