Rafa Mir, fyrrverandi leikmaður Wolves og Nottingham Forest, hefur verið ákærður fyrir kynferðisbrot.

Mir, sem 28 ára, leikur nú fyrir Elche á láni frá Sevilla. Hann var handtekinn í september 2024 á meðan hann var á láni hjá Valencia. Einnig var vinur hans, fyrrum spænski unglingalandsliðsmaðurinn Pablo Jara, handtekinn.

Samkvæmt spænskum fjölmiðlum á Mir að mæta fyrir dóm þann 13. október, vegna þess að hann er sakaður um að hafa ráðist á 21 árs gamla konu. Konan á að hafa hitt Mir og Jara á næturklúbbi og farið með þeim heim til Mir ásamt vinkonu sinni. Þar segir hún að brot hafi átt sér stað inni á baðherbergi og í sundlaug heimilisins.

Mir var í gæsluvarðhaldi í nokkra daga áður en honum var sleppt gegn tryggingu upp á hátt í 2 milljónir króna, á meðan Jara greiddi rúmlega helmingi minna. Mir var jafnframt bannað að yfirgefa landið, var gert að skila vegabréfi og bannað að vera innan við 500 metra frá meintum brotaþola meðan málið er til meðferðar.

Ef hann verður fundinn sekur gæti Mir verið dæmdur í margra ára fangelsi. Spænska knattspyrnusambandið getur einnig bannað hann í allt að fimm ár ef talið verður að hann hafi skaðað orðspor íþróttarinnar.

Mir lék með Wolves frá 2018 til 2021, en spilaði aðeins fjóra leiki með liðinu. Hann var á láni hjá Nottingham Forest í hálft tímabil 2019-20, þar sem hann lék 13 leiki.