Harley Pearce, sonur enska knattspyrnuhetjunnar Stuart Pearce, lést í hörmulegu slysi þegar hann missti stjórn á dráttarvél á sveitavegi nærri heimili fjölskyldunnar í Wiltshire í síðustu viku.

Samkvæmt lögreglunni í Gloucestershire varð slysið á A417-vegnum við Witcombe síðastliðinn fimmtudag um klukkan 14:30. Talið er að sprungið dekk hafi valdið því að dráttarvélin fór út af veginum.

Harley, sem var 21 árs, lést á vettvangi. Foreldrar hans hafa verið upplýstir og fá stuðning frá sérfræðingum lögreglunnar.

Harley var yngra barn Stuart Pearce og fyrrverandi eiginkonu hans, Liz, en þau eiga einnig dótturina Chelsea, sem keppir í hestaíþróttum og hefur tekið þátt í þremur Evrópumeistaramótum fyrir hönd Bretlands.

Harley rak eigið fyrirtæki, Harley Pearce Agricultural Service, og vann á bæjum á landamærum Wiltshire og Gloucestershire.

Stuart Pearce, sem hlaut MBE-orðu árið 1999 fyrir feril sinn og góðgerðarstörf, lék 78 landsleiki fyrir England og hefur síðustu ár starfað sem álitsgjafi hjá Talksport.