Sigurður Egill Lárusson leikmaður Vals hefur svarað yfirlýsingu félagsins sem send var út í dag. Hann segir hana lágkúrulega og er ósáttur við margt sem þar kom fram.

Valur ákvað að bjóða Sigurði Agli ekki lengri samning, leikjahæsti leikmaður í sögu Vals í efstu deild fékk skilaboð í gegnum Facebook Messenger þess efnis frá stjórnarmanni félagsins.

Sigurður hefur nú sent stuðningsmönnum Vals yfirlýsingu. „Mér leiðist mjög að munnhöggvast á netinu en ég get ekki annað en svarað yfirlýsingu Vals. Í viðtölum eftir leik í gær þegar ég var spurður út í viðskilnaðinn benti ég einfaldlega á þá staðreynd að mér hefði verið tilkynnt í gegnum Messenger að mér yrði ekki boðinn nýr samningur og mér þætti það súrt. Ég hefði kosið að fá þessa tilkynningu augliti til auglitis eða þá með símtali. Þetta snerist ekki um hvort ég fengi samning eða ekki heldur hvernig var staðið að því að tilkynna mér það. Þessu svara stjórnarmenn Vals með yfirlýsingu á Facebooksíðu félagsins með útúrsnúningi ásamt nokkrum rangfærslum sem mig klæjar í puttana að leiðrétta en læt það vera í bili,“ segir Sigurður í bréfi til stuðningsmanna.

Meira:
Yfirlýsing frá Hlíðarenda: „Þykir leitt að leikmaðurinn sé ósáttur við aðkomu okkar að málinu“

Sigurður er hins vegar ósáttur við ýmislegt í yfirlýsingu Vals og nefnir tvö dæmi. „Ég vil hins vegar nefna að í yfirlýsingu Vals er vísað til viðbóta við samning minn. Ég hef aldrei gefið leyfi til að slíkar upplýsingar væru gerðar opinberar, og tel að samningsatriði eigi ekki heima í fjölmiðlum. Slíkt ætti að fara fram milli leikmanns og félags, í trúnaði og gagnkvæmri virðingu.“

Hann segir málið aldrei hafa snúist um peninga heldur um virðingu og sammskipti. „Ég verð einnig að fá að hnýta í eftirfarandi setningu sem mér finnst bæði ómakleg og lágkúruleg: “Það er ekki fjárhagslega ábyrgt af okkar hálfu að greiða í framtíðinni fyrir afrek fortíðar.“ Þetta mál snýst ekki um peninga eða fortíð, heldur um samskipti og virðingu. Ég hefði kosið að klára þennan kafla innan dyra félagsins á jákvæðan og heiðarlegan hátt en ekki með skilaboðum á messenger og yfirlýsingu í fjölmiðlum.“

Sigurður segist hafa átt góð samskipti við marga Valsara síðustu daga. „Ég hef fengið fjöldan allan af símtölum og skilboðum síðustu daga frá Völsurum sem mér þykir ákaflega vænt um. Málinu er nú lokið af minni hálfu.“