Fabian Hürzeler, stjóri Brighton, hefur nú möguleika á að tala beint í eyrun á leikmönnum sínum á æfingum eftir að félagið fjárfesti í byltingarkenndri þýskri tækni sem Julian Draxler, fyrrverandi landsliðsmaður Þýskalands er fjárfestir í.

Brighton hefur keypt samskiptabúnað að verðmæti um 35 þúsund pund sem þeir telja geta breytt verulega gæðum æfinga og undirbúningi.

Um er að ræða kerfi sem kallast Coachwhisperer, og Brighton er talið fyrsta enska liðið til að nota búnaðinn í æfingum þó hann hafi einnig verið kynntur fyrir félögum eins og Aston Villa og Liverpool á undanförnum mánuðum.

Leikmenn klæðast vestum með lítilli tösku á bakinu þar sem lítið hátalarakerfi er falið. Þjálfarar tala í hljóðnema og þurfa því ekki lengur að hrópa leiðbeiningar yfir allan völlinn. Kerfið miðar að því að minnka misskilning og bæta nákvæmni í samskiptum.

Hürzeler getur einnig valið í gegnum app hvaða leikmenn eða leikmannahópa hann vill tala við hverju sinni, hann getur þannig aðeins valið varnarmenn til að ræða við.

Hinn framsækni 32 ára stjóri hefur enn fremur aðgang að sjálfvirkri þýðingarþjónustu, þannig að leikmenn fá skilaboðin á sínu móðurmáli ef þess þarf. Þetta gæti hjálpað til við að brúa tungumálaörðugleika innan liðsins.

Coachwhisperer, sem er þýskt fyrirtæki, býður einnig upp á greiningu á hegðun og samskiptastíl þjálfara með upptökum af æfingum. Samskiptin eru flokkuð í fimm flokka: skipulag, taktík, leiðréttingar/gagnrýni, hvatning og tæknilegar leiðbeiningar. Þannig fá þjálfarar innsýn í hvernig þeir koma fram.

Julian Draxler, nú leikmaður Al-Ahli í Katar, fjárfesti í verkefninu fyrir tveimur árum. „Þetta sparar dýrmætan tíma og hámarkar árangur inni á vellinum,“ sagði hann.