Veronique Rabiot, móðir og umboðsmaður Adrien Rabiot, hefur stigið fram og gagnrýnt Marseille harkalega eftir að sonur hennar var settur í bann frá aðalliði félagsins í kjölfar átaka í búningsklefanum.

Atvikið átti sér stað eftir 1–0 tap Marseille gegn Rennes á fyrsta leikdegi Ligue 1. Þar lenti Rabiot í átökum við enska kantmanninn Jonathan Rowe, 22 ára, sem endaði með því að öryggisgæsla þurfti að aðskilja þá í klefanum.

Forseti félagsins, Pablo Longoria, staðfesti að átökin hafi orðið „mjög ofbeldisfull“, og að báðir leikmenn hafi verið settir í bann og beðnir um að finna sér ný félög.

Þjálfari liðsins, Roberto De Zerbi, studdi þessa ákvörðun. Veronique Rabiot segir þetta svik gagnvart syni sínum og kveðst hafa orðið miður sín þegar hún frétti af ákvörðun Marseille.

„Þegar ég frétti af banninu, var það eins og að fá högg í höfuðið,“ sagði hún í viðtali við RMC.

„Þetta getur ekki verið einungis vegna þessara átaka. Adrien hefur gert svo mikið fyrir Marseille og svona launa þeir honum það. Þetta særir.“

Hún segir að Adrien sé ekki reiður, en afar vonsvikinn: „De Zerbi talar um svik, en ef einhver hefur verið svikinn í þessu máli, þá er það Adrien.“

Veronique, sem hefur verið þekkt fyrir að verja son sinn opinberlega, rifjar upp erfiða tíma hjá PSG og segir að hún hafi ekki búist við að slíkt myndi endurtaka sig: „Ég hélt að verstu tímarnir væru að baki eftir PSG, en ég hafði rangt fyrir mér. Ef hann missir heilt tímabil verður það hörmung, við höfum gengið í gegnum þetta áður og viljum ekki sjá það gerast aftur.“

Í frekari vörn fyrir Adrien vísaði hún í mál Mason Greenwood, sem Marseille samdi við í fyrraog hvatti De Zerbi til að sýna jafn mikla fyrirgefningu í garð sonar síns.

„Þegar Mason Greenwood skrifaði undir eftir að hafa barið kærustuna sína, sagði De Zerbi að hann ætti skilið annað tækifæri. Ég er sammála því að fólk eigi að fá annað tækifæri en á sonur minn þá ekki líka rétt á því?“