Fyrrum njósnari hjá Manchester United, Mick Brown, segir að félagið muni gera allt til þess að fá inn Emiliano Martinez í sínar raðir í sumar.

Það þýðir líklega að Andre Onana sé að kveðja þá rauðklæddu en hann hefur ekki beint staðist væntingar eftir komu frá Inter Milan.

Martinez er talinn vera einn besti markvörður heims en hann er að yfirgefa Aston Villa og hefur að öllum líkindum spilað sinn síðasta leik fyrir félagið.

Brown þekkir til United en samkvæmt honum þá verður allt gert til þess að landa argentínska markverðinum fyrir næsta vetur.

,,Manchester United hefur í raun staðfest það að félagið hafi áhuga á Martinez. Þeir munu fá það sem er í boði fyrir Onana,“ sagði Brown.

,,Þeir munu hafa samband við Aston Villa og sjá hvort skiptin geti gengið í gegn. Þeir horfa á hann sem mun öflugri kost en Onana og eru tilbúnir að koma hlutunum af stað sem fyrst.“