Kristian Nökkvi Hlynsson er á meðal þeirra leikmanna sem fengu mjög óþægileg skilaboð á WhatsApp forritinu nú rétt fyrir helgi.

Þetta kemur fram í De Telegraaf í Hollandi en Kristian er leikmaður Ajax og má nú ekki æfa með aðalliði félagsins.

Sjö leikmenn Ajax fengu þau skilaboð að þeir ættu ekki framtíð fyrir sér hjá félaginu og þar á meðal Kristian og Chuba Akpom, fyrrum undrabarn Arsenal.

Alex Kroes, yfirmaður knattspyrnumála Ajax, sá um að senda þessi skilaboð en þessir sjö leikmenn mega æfa á æfingasvæði liðsins svo lengi sem aðalliðið sé búið með sína æfingu.

John Heitinga er nýr stjóri Ajax en liðið er að reyna að losa leikmenn svo hann geti styrkt hópinn fyrir næsta vetur.

Kristian var í láni hjá Sparta Rotterdam á síðustu leiktíð en hann spilaði 33 leiki fyrir aðallið Ajax 2023-2024.

Kristian stóð sig vel með Sparta og er talið að þónokkur félög séu að sýna honum áhuga þessa stundina.