Búið er að draga í 2. umferð undankeppni Sambandsdeildarinnar, þar sem allt að fjögur íslensk lið gætu tekið þátt.

Fari svo að Íslandsmeistarar Breiðabliks detti úr leik gegn albanska liðinu Egnatia í 1. umferð undankeppni Meistaradeildarinnar mun liðið mæta Ludogorets frá Búlgaríu eða Dinamo Minsk frá Hvíta-Rússlandi í Sambandsdeildinni, en það varð ljóst eftir dráttinn í dag.

Það er til mikils að vinna fyrir Blika að fara í 2. umferð Meistaradeildarinnar, komast hjá þessu einvígi og vera allavega öruggir með umspilssæti inn í Sambandsdeildina. Fari þeir áfram gegn Egnatia mæta þeir Lech Poznan í næstu umferð Meistaradeildarinnar.

Ljóst er að bikarmeistarar KA koma beint inn í 2. umferðina og fær iðið erfitt verkefni gegn danska liðinu Silkeborg. Þess má geta að heimaleikur liðsins, seinni leikurinn í rimmunni, fer fram á Akureyri eftir að UEFA veitti fyrir því undanþágu.

Sigri Víkingur einvígi sitt við Malisheva frá Kósóvó fer liðið til Vllaznia í Albaníu, sem Valur sló út í fyrra, eða Daugavpils frá Lettlandi.

Valur mætir þá Zalgiris frá Litháen eða Penybont frá Wales, slái liðið út Flora Tallin.

Leikir íslensku liðanna
Ludogorets/Dinamo Minsk – Breiðablik/Egnatia
Silkeborg – KA
Vllaznia/Daugavpils – Malisheva/Víkingur
Zalgiris/Penybont – Valur/Flora Tallin

Leikirnir fara fram 24. júlí og 31. júlí.