Tveir belgískir knattspyrnuáhugamenn földu sig inni á salerni Allianz-leikvangsins í Munchen á dögunum til að sjá úrslitaleik Meistaradeildarinnar endurgjaldslaust.
Mennirnir sem um ræðir eru Neal Remmerie og Senne Haverbeke. Birtu þeir myndband af því hvernig þeir fóru af á samfélagsmiðla sína, eins og sjá má hér neðar.
Þeir komust inn á leikvanginn daginn fyrir leikinn, héldu inn á sitt hvorn salernisbásinn og dvöldu þar í 27 klukkustundir. Komu þeir fyrir skiltum sem á sagði að básarnir væru ekki í notkun vegna bilunar.
„Við vorum með mat í töskunni okkar og síminn stytti okkur stundir. Ljósin voru kveikt allan tímann og líkamsstaða okkar var ekki þægileg,“ sagði Remmerie.
Þegar þeir heyrðu að stuðningsmenn PSG og Inter, sem áttust við í leiknum, voru mættir drifu þeir sig út. Þurftu þeir að komast framhjá einni öryggisgæslu enn, miðalausir. Það hafðist.
„Við fylgdumst vel með því hvaða öryggisvörður fylgdist minnst með,“ sagði Remmerie.
Sátu þeir félagar svo með stuðningsmönnum PSG á leiknum og var gleðin mikil, enda vann liðið 5-0.
@neal_senne Inbreken Champions League Finale ⚽️🏆 #fyp #foryou #fy #voorjou #belgium #belgie #viral #nederland #netherlands #championsleague ♬ origineel geluid – Neal & Senne
