„Þetta er fallegur dagur í dag, að koma aftur heim í Mosfellsbæ,“ sagði Axel Óskar Andrésson eftir að hafa verið kynntur sem nýr leikmaður Aftureldingar.

Miðvörðurinn var kynntur sem leikmaður nýliðanna ásamt bróður sínum, Jökli Andréssyni, og þeim Oliver Sigurjónssyni og Þórði Gunnari Hafþórssyni. Axel og bróðir hans eru uppaldir í Mosfellsbænum og hafa verið sterklega orðaðir við Aftureldingu undanfarið.

„Það var ekki langur aðdragandi í samningamálum og þegar kom að því að selja mér verkefnið. En þetta tók smá tíma, sennilega verst geymda leyndarmál síðustu mánaða á Íslandi.“

Það hefur mikla þýðingu fyrir Axel að Jökull hafi skrifað undir einnig.

„Það er bara allt, að bræðurnir komi saman hérna heim. Ég eiginlega trúi ekki að þetta sé að gerast því ég hélt þetta myndi ekki gerast á næstu árum.“

Axel segir margt hafa breyst hjá Aftureldingu frá því hann yfirgaf félagið fyrir tíu árum síðan og hélt til Englands.

„Það er rosalegur metnaður í kringum allt hérna. Þetta er dálítið mikið öðruvísi en fyrir tíu árum. Maggi og hans fjölskylda hafa gert góða hluti. Þetta er að verða alvöru batterí.“

Axel var hjá KR í fyrra en fór í gegnum erfiða kafla í liði sem var mjög undir væntingum.

„Ég vil rosalega mikið sýna hvað ég hef fram að færa. Þetta var rosalega erfitt tímabil með KR en það var svo margt sem spilaði inn í. Ég mun kryfja það seinna.“

Það var áhugi á Axel annars staðar frá en valið að lokum var einfalt.

„Ég talaði við einhverja klúbba á Íslandi og svo var samningstilboð vestan hafs. En þegar við Jökull komum komum saman með fjölskyldum okkar kom ekkert annað til greina.“