Þórður Gunnar Hafþórsson var í dag einn fjögurra leikmanna sem var kynntur til leiks hjá Aftureldingu, sem er nýliði í Bestu deildinni á næstu leiktíð.
„Tilfinningin er rosalega góð. Ég er gríðarlega spenntur fyrir komandi tímum í Mosfellsbænum,“ sagði Þórður við 433.is í dag.
Hann kemur frá Fylki, sem féll úr Bestu deildinni í haust.
„Ég er búinn að vera í Fylki í fimm ár og það var rosalega skemmtilegur og lærdómsríkur tími. Það var alveg erfitt að fara úr Árbænum.“
Auk Þórðar skrifuðu Oliver Sigurjónsson og bræðurnir Axel Óskar og Jökull Andréssynir undir í Mosfellsbænum í dag.
„Afturelding ætlar í Bestu deildina til að gera hluti, ekki bara til að leika sér. Reyna jafnvel að komast í topp sex eða eitthvað svoleiðis. Það væri bara draumur.“
