Þorgerður Katrín Gunnarsdóttir, formaður Viðreisnar, var gestur Helga Fannars Sigurðssonar og Hrafnkels Freys Ágústssonar í Íþróttavikunni á 433.is þetta skiptið.
Þar var til að mynda að sjálfsögðu rætt um frækinn sigur Víkings á Borac Banja Luka frá Bosníu í Sambandsdeildinni á fimmtudag. Liðið kom sér í álitlega stöðu upp á að koma sér áfram á næsta stig keppninnar.
„Mér fannst sjokkerandi hvað Bosníumennirnir voru lélegir. Þetta lið gerði jafntefli Panathinaikos og vann APOEL frá Kýpur. En svo sá ég að þeir duttu út fyrir B36 í Færeyjum fyrir tveimur árum. Er gervigrasið kannski svolítið mikil breyting fyrir þessa leikmenn sem spila alltaf á grasi? Þetta er forskot fyrir okkur sem við eigum að nýta okkur,“ sagði Hrafnkell.
Þorgerður var hrifinn af því sem hún sá frá Víkingi, sérstaklega í ljósi þess að liðið tapaði úrslitaleik Bestu deildarinnar gegn Breiðabliki stórt á dögunum. Hún er mikill aðdáandi þjálfara liðsins.
„Mér fannst það sýna mjög mikinn karakter því auðvitað var þetta áfall fyrir Víkingana. Ég hef ótrúlega gaman að Arnari Gunnlaugssyni, karakterinn sem hann er, það er ekkert bullshit.“
Umræðan í heild er í spilaranum.
