Arnar Björnsson vann sinn síðasta dag í fjölmiðlum í gær eftir um fjörtíu ár í starfi. Arnar vann hjá RÚV síðustu ár í almennum fréttum.

Arnar er þekktastur fyrir störf sín sem íþróttafréttmaður og var um langt skeið einn sá færasti í þeim bransa á Íslandi.

Arnar sagði upp störfum á RÚV fyrir þremur mánuðum síðan og vann sinn síðasta dag í gær. „Kæru vinir. Ég þakka fyrir þær fjölmörgu kveðjur sem mér hafa borist eftir að ég lauk störfum á fréttastofu RÚV í gær. Þessi hlýhugur kemur mér á óvart en þykir vænt um. Ég hef verið svo lánssamur að vinna með úrvalsfólki í öll þessi ár. Margir góðir félagar eru látnir og ég minnist þeirra með virðingu,“ skrifar Arnar

„Lokaspretturinn á starfsævinni á RÚV var mikið ævintýri og mér þótti vænt um hlýhuginn sem mér var sýndur þegar gamall samverkamaður var kvaddur. Svo má ekki gleyma öllum viðmælendum mínum og þeim þakka ég einnig. Nú tekur við annar kafli sem ég er viss um að verður skemmtilegur.“

Arnar ætlar nú að fara að njóta lífsins. „Mér hefur alltaf þótt lífið skemmtilegt og sé enga ástæðu til að skipta um skoðun núna.“