Stjórn Knattspyrnudeildar Vals og Pétur Pétursson aðalþjálfari kvennaliðs Vals hafa komist að samkomulagi um að Pétur hætti þjálfun liðsins.

Pétur hefur unnið fjóra íslandsmeistaratitla og tvo bikarmeistaratitla síðan hann tók við liðinu árið 2017.

„Pétur hefur náð stórkostlegum árangri með kvennaliðið okkar síðustu sjö ár og skapað margar góðar minningar sem við valsfólk verðum honum ævinlega þakklát fyrir. Pétur hefur átt stórkostlegan feril sem þjálfari sem spannar hátt í þrjátíu ár og við vitum öll hvað hann gerði sem leikmaður. Það er klárt að Pétur er eitt af þessu stóru nöfnum þegar kemur að fótboltanum hér á landi. Hann er nú á leið í verðskuldað frí til Spánar og óska ég honum alls hins besta og hlakka til þess að fá hann í kaffi niður að Hlíðarenda og rífast við hann um fótbolta,“ segir Björn Steinar Jónsson nýkjörinn formaður Vals.

Pétur Pétursson er með einföld skilaboð:

„Takk fyrir mig.“

Ekki liggur fyrir hver mun taka við liðinu af Pétri en ný stjórn vonast til þess að klára þau mál sem allra fyrst.