Það voru líklega fáir glaðari en forráðamenn knattspyrnudeildar Gróttu í gær þegar Orri Steinn Óskarsson framherji FCK var seldur til Real Sociedad á Spáni.
Fyrir Orra greiddi spænska liðið 20 milljónir evra eða rúma 3 milljarða íslenskra króna.
Grótta seldi Orra árið 2020 þegar hann var 16 ára gamall til FCK, samkvæmt heimildum 433.is lögðu forráðamenn Gróttu mikið upp úr því að hjálpa Orra út.
Félagið bað ekki um háa upphæð fyrir framherjann efnilega heldur setti inn klásúlu um verulega prósentu af næstu sölu. Sem nú hefur orðið að veruleika.
Hundruð milljóna munu því skila sér inn á reikninginn hjá Gróttu vegna viðskipta Orra. Félagið samdi vel við FCK og mun rekstur Gróttu vera mun bærilegri næstu árin með þessum peningum sem koma inn vegna sölu Orra.
Orri er tvítugur framherji sem mun nú reyna fyrir sér í úrvalsdeildinni á Spáni.
