Helgi Fannar Sigurðsson skrifar frá Búdapest

Landsliðsmaðurinn Alfreð Finnbogason er, eftir landsleikjahlé sem nú stendur yfir, á leið í fjögurra liða umspil með félagi sínu, Eupen, um að forðast fall úr belgísku úrvalsdeildinni. Þar er einnig Freyr Alexandersson með sína menn í Kortijk.

„Hann hefur byrjað allt of vel fyrir minn smekk,“ sagði Alfreð léttur í bragði um gengi Freys eftir hann tók við Kortijk. Freyr er búinn að snúa við gengi liðsins og gefa stuðningsmönnum von um að halda sér uppi frá því hann tók við á miðju tímabili.

„Mér fannst hann svolítið klikkaður að taka þetta starf því þeir voru nánast fallnir. Það var enginn að búast við neinu en hann hefur svo sannarlega náð að snúa þessu við. Hann er búinn að koma stöðugleika á vörnina hjá þeim og halda mikið hreinu. Þá muntu pikka upp stig.

Manni finnst leikmenn þeirra núna hafa trú á þessu. En ég vona að það sé bara tímabundin gleði og að það snúist við.“

Alfreð og Freyr þekkjast vel, unnu saman hjá íslenska landsliðinu og Lyngby.

„Ég þekki Frey vel og óska honum alls hins besta. Það er erfitt að vera í beinni samkeppni við hann á þessu augnabliki.“

Ítarlegt viðtal við Alfreð má nálgast í spilaranum. Rætt var við hann eftir landsliðsæfingu Íslands hér í Búdapest í gær.