Helgi Fannar Sigurðsson skrifar frá Búdapest

Landsliðsframherjinn Alfreð Finnbogason vonast til þess að sjá Gylfa Þór Sigurðsson í íslenska landsliðinu á ný í framtíðinni, en sá síðarnefndi var svekktur að vera ekki með í hópnum sem mætir Ísrael á fimmtudag.

Ísland og Ísrael mætast í undanúrslitum umspils um sæti á EM á fimmtudag. Gylfi, sem skrifaði undir við Val á dögunum, sagðist í samtali við 433.is vera ansi svekktur að vera ekki í hópnum.

„Ef Gylfi er að spila í hverri viku er hann klárlega leikmaður sem nýtist landsliðinu. Ég held að það sé engin umræða,“ sagði Alfreð við 433.is eftir æfingu Íslands í Búdapest, þar sem leikurinn gegn Ísrael fer fram, í kvöld.

„Þekkjandi hann þá vill hann alltaf meira. Hann hefur rétt á sínum tilfinningum. Ég leyfi öðrum að dæma um hvort þær séu sanngjarnar eða ekki.“

Alfreð hefur trú á að Gylfi komi sér í landsliðið á ný.

„Það er hans karakter að vilja alltaf meira og fara hundrað prósent í það sem hann gerir. Þess vegna hefur hann átt svona farsælan feril. Vonandi fer hann bara vel af stað með Val og fer svo að nýtast landsliðinu þegar hann er kominn í toppstand.“

Ítarlega var rætt við Alfreð um komandi verkefni í viðtalinu, sem má nálgast í spilaranum.