Það er möguleiki á að enn einn fyrrum liðsfélagi Lionel Messi sé á leið til bandaríska félagsins Inter Miami.

Messi hefur fengið þrjá vini sína til að skrifa undir í Miami eða þá Sergio Busquets, Jordi Alba og Luis Suarez.

Nú er annar fyrrum samherji Messi hjá Barcelona orðaður við Miami eða Philippe Coutinho sem leikur með Aston Villa.

Coutinho er 31 árs gamall en spilar með Al Duhail í Katar á lánssamningi þessa stundina.

,,Ég er bara að einbeita mér að núinu, ég vil halda mér heilum og undirbúa mig vel og spila góða leiki,“ sagði Coutinho.

,,Ég vil getað notið mín á vellinum. Við vitum þó aldrei hvað gerist í framtíðinni og það er talað um mig í fjölmiðlum reglulega.“

,,Ég reyni að halda mig frá þessum sögusögnum og einbeiti mér að því að sinna mínu starfi.“