AB í Danmörku staðfestir að Ágúst Eðvald Hlynsson hafi skrifað undir samning við AB þar í landi og gerir hann rúmlega þriggja ára samning við félagið.

Tipsbladet segir að Ágúst komi frítt til félagsins þrátt fyrir að hafa átt tvö ár eftir af samningi sínum við Breiðablik.

Samkvæmt heimildum 433.is fékk Ágúst þau skilaboð frá Breiðablik að hann yrði í litlu hlutverki á næstu leiktíð og mætti finna sér nýtt félag.

Er þetta ákvörðun sem Halldór Árnason, nýr þjálfari Breiðabliks tók. Ágúst var fenginn til Breiðabliks fyrir rúmu ári síðan.

Ágúst kom til Breiðabliks frá Horsens í Danmörku en Óskar Hrafn Þorvaldsson, þá þjálfari Breiðabliks lagði mikla áherslu á að fá hann. Valur þar sem Ágúst hafði verið á láni fór í harða baráttu um að landa kappanum.

Ágúst var ungur að árum sem leikmaður Bröndby og frá 2020 til 2023 var hann í herbúðum Horsens en fór á þeim í tvígang á láni til Íslands.

Ágúst er fæddur árð 2000 og þrátt fyrir ungan aldur verður AB hans áttunda félag á ferlinum en félagið er nokkuð stórhuga og hefur nýlega fengið eiganda sem dælir fjármunum í félagið.