Hjörvar Hafliðason, stjórnandi Dr. Football efast um það að listi Viðskiptablaðsins um launahæstu atvinnumenn í heimi sé réttur.

Það sem fær Hjörvar til að efast um fréttina sem birtist rétt fyrir lok ársins er það að Sverrir Ingi Ingason, varnarmaður Midjylland sé í þrettánda sæti.

Sverrir var fyrri hluta árs hjá PAOK í Grikklandi og gerði svo stóran samning í Danmörku.

„Minn uppáhalds miðill fyrir utan Dr. Football er Viðskiptablaðið, hins vegar hefur þeir mátt hringja í mig áður en þeir birtu listann um 40 launahæstu atvinnumennina. Ég gef mér að hér sé alls konar bull,“ sagði Hjörvar í sínum nýjasta þætti.

Hann segir að nokkrir leikmenn sem eru settir ofar á listann en Sverrir séu aldrei með hærri laun en hann. Sverrir var samkvæmt Viðskiptablaðinu með 110 milljónir á síðasta ári.

„Ég get lofað ykkur að Orri Steinn, Andri Fannar, Ísak Bergmann, Hörður Björgvin og fleiri eru ekki launahærri en Sverrir Ingi Ingason. Sverrir var fyrir utan Jóhann Berg, mjög nálægt því að vera númer tvö.“

„Hann er ekki 13 launahæsti leikmaðurinn, Jón Daði með 110 milljónir á ári er bull í þriðju efstu deild. Þar er verið að teygja sig.“

„Ég held að Orri Steinn sé á unglingasamninga, hann er ekki á þessum 120 milljónum eins og þeir segja þarna.“

Jóhann Berg er launahæsti atvinnumaður Íslands samkvæmt Viðskiptablaðinu með 580 milljónir í árslaun. „Þetta er bara gisk,“ segir Hjörvar um listann.