Margir velta framtíð Gylfa Þórs Sigurðssonar fyrir sér eftir að mál hans tók enda í Manchester. Eftir tvö ár frá fótboltanum er Gylfi Þór líklegur í að snúa aftur.
Age Hareide landsliðsþjálfari Íslands vonast eftir endurkomu Gylfa og Aron Einar Gunnarsson fyrirliði landsliðsins hefur sagt frá því að von sé á endurkomu Gylfa.
Gylfi fagnar 34 ára afmæli sínu í haust og framtíð hans var til umræðu í hlaðvarpsþættinum Dr. Football í dag.
„A – Ég hef heyrt að Gylfi Þór Sigurðsson sé staddur á Spáni núna að æfa fótbolta,“ sagði Hjörvar Hafliðason í þætti dagsins.
Hjörvar sagðist svo hafa heyrt þá sögu að Gylfi skoði það að spila á Íslandi til að byrja með og að Lengjudeildin gæti verið kostur.
„B – Ég hef heyrt að Gylfi sé jafnvelt til í að koma sér í gang á Íslandi, sé alveg sama hvort það sé A-deild eða B-deild. Bara að það sé á grasi, ég hef heyrt Grindavík í því samhengi. Hann vilji bara koma sér í gang,“ segir Hjörvar.
Hann segist hafa heyrt af tilboði frá Katar til Gylfa. „Ég hef heyrt að hann sé með tilboð frá Katar. Ég vona að ég sjái hann spila fótbolta aftur,“ segir Hjörvar.