Aron Einar Gunnarsson, fyrirliði Íslands telur meiri líkur en minni á því að Gylfi Þór Sigurðsson spili fótbolta aftur eftir tveggja ára fjarveru frá leiknum. Þetta kom fram í viðtali við Aron Einar í hlaðvarpsþættinum, Þungavigtin.

Gylfi Þór hefur ekki spilað fótbolta frá því að lögreglan í Manchester hóf rannsókn á máli gegn honum í júlí sumarið 2021. Málið var fellt niður á dögunum og Gylfi laus allra mála.

Gylfi hefur verið á Íslandi undanfarnar vikur en Aron Einar hefur rætt við Gylfa og vonar að hann taki skóna fram og sanni ágæti sitt á nýjan leik.

Aron Einar og Gylfi hafa lengi verið liðsfélagar í landsliðinu og Aron hefur rætt við hann eftir að málinu í Bretlandi lauk. „Við höfum átt gott spjall, ég ætla að leyfa honum að opna umræðuna. Opna á það sem hann vill gera, án þess að setja pressu á hann þá vil ég sjá hann úti á velli aftur,“ segir Aron Einar.

Aron Einar vonar að Gylfi taki fram skóna og telur að það væri ansi mikilvægt fyrir landsliðið í knattspyrnu sem reynir nú að komast inn á Evrópumótið í Þýskalandi á næsta ári.

„Ég vona að hvað sem hann gerir eða tekur sér fyrir, þá styður mann hann í það. Ef hann kemur inn á völlinn þá væri það gríðarlega mikilvægt fyrir okkur sem landslið, ef hann vill,“ segir Aron.

Kristján Óli Sigurðsson, sérfræðingur Þungavigtarinnar spurði Aron þá að því hvort líkurnar væru meiri en minni.

„Ef hann hefur áhuga og gaman af því, mér finnst það líklegra en ekki. Það verður að koma í ljós, mér finnst það líklegra,“ segir Aron.

Gylfi Þór Sigurðsson lék síðast með Everton en samningur hans þar rann út á síðasta ári, hefur hann verið orðaður við lið í Bandaríkjunum, Sádí Arabíu og Katar undanfarnar vikur.