FH vann í gær Þungavigtarbikarinn með sigri á Breiðabliki í úrslitaleiknum.
Leiknum lauk 4-0 fyrir FH en fór hann fram á heimavelli Blika í Kópavogi.
Kristján Óli Sigurðsson sparkspekingur varar FH-inga þó við að verða of bjartsýnir fyrir sumarið þrátt fyrir stórsigurinn í gær.
„Þeir eru ekki að fara að segjast ætla að stefna á að vera í efri hlutanum. Þeir eru þannig klúbbur að þeir stefna á Íslandsmeistaratitilinn,“ segir Kristján í Þungavigtinni.
„Ég get samt hryggt þá með því að það er ekki séns í helvíti að þeir verði Íslandsmeistarar í sumar.“
Kristján gaf þáttastjórandanum, Rikka G, svo áhugavert loforð ef FH tekst að láta hann éta orð sín og verða Íslandsmeistari.
„Þú mátt raka mig sköllóttan og setja FH tattú á bringuna á mér (ef það gerist).“
FH var óvænt í fallbaráttu í Bestu deildinni síðustu sumar. Markið er án efa sett mun hærra í ár.