Aron Elís Þrándarson gekk til liðs við uppeldisfélag sitt Víking R í vikunni. Kappinn er aðeins 28 ára gamall og hefur gert gott mót í atvinnumennsku undanfarin ár.

Af því tilefni tóku strákarnir í Þungavigtinni saman skemmtilegan lista yfir heimkomur atvinnumanna í boltann hér heima.

Bæði völdu þeir fimm bestu og fimm verstu heimkomurnar og voru mörg kunnugleg andlit á lista.

Var það samdóma álit strákanna að Tryggvi Guðmundsson, markahrókur úr Eyjum, hefði átt bestu heimkomuna er hann kom til liðs við Íslandsmeistara FH fyrir tímabilið 2005.

Tveimur árum síðar eða árið 2007 kom Rúnar Kristinsson heim eftir mörg farsæl ár í atvinnumennskunni en heimkoma hans var mikil vonbrigði þar sem hann gerði tveggja ára samning við KR en lék einungis annað af þeim tveimur árum fyrir félagið. Var sú heimkoma valin sú versta.

Listarnir í heild sinni voru eftirfarandi:

Bestu heimkomur
Tryggvi Guðmundsson (Í FH 2005)
Arnar Grétarsson (Í Breiðablik 2006)
Kári Árnason (Í Víking 2019)
Birkir Már Sævarsson (Í Val 2018)
Pálmi Rafn Pálmason (KR 2015)

Verstu heimkomur
Rúnar Kristinsson (Í KR 2007)
Stefán Gíslason (Í Breiðablik 2014)
Hallgrímur Jónasson (Í KA 2018)
Björn Daníel Sverrisson (Í FH 2019)
Ragnar Sigurðsson (Í Fylki 2021)