Logi Tómasson leikmaður Víkings var kjörinn besti leikmaður fyrri umferðar Bestu deildarinnar í Íþróttavikunni sem frumsýnd var í kvöld á 433.is og í Sjónvarpi Símans.
Logi er 24 ára gamall en hefur svo sannarlega bætt leik sinn á síðustu árum og er einn fremsti leikmaður deildarinnar í dag.
„Við erum búnir að standa okkur helvíti vel, búnir að vera þéttir. Liðsheildin búinn að vera mjög góð, margir búnir að standa sig vel,“ segir Logi sem vill ekki gera of mikið úr góðri frammistöðu sinni.
Logi hefur bætt á sig vöðvum frá síðasta ári og er sterkari en áður, hann segist hafa fundið það hjá sjálfum sér að vilja verða betri.
„Ég var ekki saddur í fyrra, ég stóð mig vel sóknarlega í fyrra en ég vildi laga varnarleikinn. Ég er heilsteyptari leikmaður, ég einblínti á það í vetur. Að verða sterkari og betri í návígum. Mig langaði að gera það sjálfur, mig langar að spila og vera í einu besta liði á landinu. Þetta kom frá mér sjálfum,“ segir Logi.
Logi vill ekki ræða það að Víkingur sé í dauðafæri á tvennunni, liðið hefur öruggt forskot í deildinni og er í undanúrslitum bikarsins. „Ég ætla ekki að tala um það núna, þetta lítur vel og við erum að vinna alla leiki. Þetta lítur vel út í dag, fótboltinn er þannig að það getur allt gerst.“
Logi ólst upp hjá Víkingi og sá félagið sitt ganga í gegnum erfiða tíma en undanfarið hefur Víkingur orðið að risa í íslenskum bolta og vinnur liðið titla á nánast hverju ári. „Sérstaklega því ég er Víkingur, þetta er geðveikt,“ segir Logi.
Logi er samkvæmt sögusögnum á leið í atvinnumennsku á næstu dögum en vill lítið gefa upp. „Ég veit það ekki, ég held að það sé einhver áhugi á mér. Það er ekki komið tilboð, ég er bara að hugsa um að spila vel með Víking. Maður er leikmaður Víkings og er að spá í að gera vel með þeim, ég fókusa á sjálfan mig,“ segir Logi.
Hann telur að hann klári tímabilið með sínu félagi. „Ég held að ég klári tímabilið með Víking, ég einbeiti mér bara að þeim. Það er það sem skiptir máli.“
Viðtalið er í heild hér að ofan.
