Eins og alþjóð veit tapaði íslenska karlalandsliðið fyrir því portúgalska í undankeppni EM 2024 í gær. Tapið var grátlegt og Strákarnir okkar stóðu sig frábærlega.
Hinn magnaði Cristiano Ronaldo skoraði eina markið í blálokin – og það í sínum 200. landsleik.
„Að vinna leiki svona, með baráttu og sigurmarki á 89. mínútu, er enn sætara,“ sagði Ronaldo eftir leik.
Kvöldsólin gerði Ronaldo þá erfitt fyrir.
„Það eru bara þrír dagar frá leiknum gegn Bosníu. Svo er alltaf þreyta eftir ferðalag. Eins og þið sjáið þá er líka enn bjart, jafnvel þó þú sért með bundið fyrir augun þá er alltaf ljós.
Liðið spilaði vel og það skiptir mestu máli.“
Ronaldo og félagar voru ekkert að staldra við á Íslandi. Þeir héldu út á Keflavíkurflugvöll beint eftir leik og flugu heim.
Ísland er komið í erfiða stöðu í undanriðlinum. Liðið er nú sjö stigum á eftir Slóvakíu sem situr í öðru sæti.
