Fjöldinn allur af stjörnum úr Evrópuboltanum heldur til Sádi-Arabíu þessi misserin. Gylfi Þór Sigurðsson fékk stórt tilboð þaðan fyrir tæpum þremur árum síðan en hafnaði því.
Þetta segir Hjörvar Hafliðason í hlaðvarpi sínu, Dr. Football.
„Það er einn maður sem hlýtur að vera heima hjá sér núna að berja enninu í borðið. Það er Gylfi Sigurðsson,“ segir Hjörvar í þætti dagsins.
„Hann var með monster-tilboð og ég veit þetta upp á tíu. Hann var með geðveikt tilboð frá Sádí haustið 2020 en af einhverjum fótboltaprinsipp ástæðum, þar sem hann var bara 31 árs, vildi hann ekki fara.
Hann missti af þessari peningalest,“ heldur Hjörvar áfram.
Gylfi var þess í stað áfram hjá Everton í ensku úrvalsdeildinni en í dag er hann félagslaus. Það er óvíst hvort hann taki skóna fram að nýju.
Menn á borð við Cristiano Ronaldo og Karim Benzema hafa farið til Sádi-Arabíu undanfarið. Þá eru fleiri á leiðinni. Má þar nefna miðjumanninn N’Golo Kante.
