Íslenska landsliðið í knattspyrnu lék með sorgarbönd gegn Slóvakíu á laugardag. Ástæðan var sú að fósturfaðir landsliðsmannsins, Guðlaugs Victors Pálssonar lést í síðustu viku.

Guðlaugur Victor lék allan leikinn í svekkjandi tapi Íslands á laugardag og var einn besti leikmaður liðsins. Leikmenn liðsins hafa staðið þétt við bak hans á erfiðum tímum.

„Magnaður karakter sem Gulli er,“ skrifar Jóhann Berg Guðmundsson sem var fyrirliði Íslands í leiknum.

Magnaður karakter sem Gulli er💙🙌 https://t.co/fp9nTRcGm3

— Johann B Gudmundsson (@Gudmundsson7) June 18, 2023

„Hann er góður karakter, allir strákarnir hafa verið daprir vegna þeirra frétta sem Guðlaugur fékk,“ sagði Age Hareide eftir tapið gegn Slóvakíu

Hareide segir að leikmennirnir hafi staðið þétt við bak Guðlaugs á mjög erfiðum tímum. „Leikmennirnir hafa hugsað vel um hann, ég vona að fótboltinn hafi hjálpað honum að dreyfa huganum. Hann gerði vel þegar hann fór upp á miðsvæðið rétt fyrir leik, hann spilaði vel,“ sagði Hareide.

Búist er við að Guðlaugur Victor verði áfram í byrjunarliði Íslands þegar liðið mætir Portúgal í erfiðum leik á Laugardalsvelli á morgun.

Alfreð Finnbogason sem skoraði mark Íslands í leiknum birtir svo mynd af þeim félögum á Instagram þar sem hann setur blátt hjarta við myndina.