Mikel Arteta vill að Pierre-Emerick Aubameyang fái hlýjar móttökur þegar hann snýr aftur á Emirates-leikvanginn í kvöld.

Arsenal tekur þá á móti Chelsea. Í röðum síðarnefnda liðsins er Aubameyang. Fyrir sextán mánuðum yfirgaf sóknarmaðurinn Arsenal á slæmum nótum og hélt til Barcelona.

Arteta hafði tekið fyrirliðabandið af Aubameyang og var samningi kappans að lokum rift.

Aubameyang hefur gengið herfilega hjá Chelsea á leiktíðinni, sem og liðinu öllu, og verið úti í kuldanum. Hann fékk þó að spila seinni hálfleikinn í síðasta leik undir stjórn Frank Lampard. Þá tapaði Chelsea gegn Brentford á heimavelli.

„Við skulum þakka honum fyrir, sýna virðingu og þakklæti fyrir það sem hann gerði fyrir okkur,“ segir Arteta.

„Hann var ótrúlegur fyrir okkur, skoraði mikið af mörkum og var fyrirliði okkar. Hann á skilið að fá góðar móttökur.

Arsenal á enn veika von um að verða Englandsmeistari. Liðið missti fyrsta sætið til Manchester City um helgina eftir slæmt gengi undanfarið. Stig skilur liðin að en City á leik til góða. Róðurinn er því orðinn þungur fyrir Skytturnar.

Chelsea hefur verið í algjöru rugli á tímabilinu og er um miðja deild.

Leikurinn hefst klukkan 19 í kvöld að íslenskum tíma.